काठमाडौं, १८ साउन । एक टेलिभिजन अन्तर्वार्तामा विवादित अभिव्यक्ति दिएपछि पक्राउ परेकी अधिवक्ता भगवती पाण्डे रिहा भएकी छन् । उनी बुधबार नै रिहा भएकी हुन् ।

अधिवक्ता पाण्डले केही दिनअघि एक टेलिभिजन अन्तर्वार्ताका क्रममा मुस्लिम, मगर, तामाङ लगायत समुदायमा दाजुबहिनीबीच विवाह हुने विवादास्पद अभिव्यक्ति दिएकी थिइन् ।

त्यसपछि उनीविरुद्ध प्रहरीमा उजुरी परेको थियो । तर उनलाई प्रहरीले पक्राउ नगरेको भन्दै प्रदर्शन हुँदै आएको थियो । बुधबार विहान मात्रै उनी पक्राउ परेका थिए ।

प्रहरीले उनीविरुद्ध जातीय घृणा तथा द्वेष फैलाउने कसुरमा अनुसन्धान अगाडि बढाउन काठमाडौं जिल्ला अदालतबाट अनुमति मागेको थियो। तर अदालतले उनलाई हिरासतमा राख्ने अनुमति नदिएपछि पाण्डे रिहा भएकी हुन् ।