काठमाडौं । करिब दुई तिहाई बहुमतसहितको राष्ट्रिय स्वतन्त्र पार्टी (रास्वपा)ले बालेन्द्र शाह (बालेन)को नेतृत्वमा सरकार गठनको सबै गृहकार्य पूरा गरेको छ । आगामी चैत १३ गते शुक्रबार रामनवमीको शुभ साइतमा प्रधानमन्त्री पदको सपथ लिने तयारीमा रहेका बालेन र पार्टी सभापति रवि लामिछानेबीच १५ सदस्यीय मन्त्रिपरिषद् बनाउने औपचारिक सहमति भएको छ ।

बालेन स्रोतका अनुसार दुवै नेताले लामो छलफलपछि मन्त्रिपरिषद्को पूर्ण सूची टुंग्याएका छन् । स्रोतका अनुसार प्रस्तावित मन्त्रिपरिषद् यसप्रकार छ :-

प्रधानमन्त्री तथा रक्षामन्त्री : बालेन्द्र शाह (बालेन)
गृहमन्त्री : डिपी आर्याल
अर्थमन्त्री : डा. स्वर्णिम वाग्ले
परराष्ट्रमन्त्री : शिशिर खनाल
सञ्चार तथा सूचना प्रविधिमन्त्री : मनिष झा
जलस्रोत तथा सिँचाइमन्त्री : अमरेश सिंह
भौतिक पूर्वाधार तथा यातायातमन्त्री : डा. सुनिल लम्साल
शिक्षा, विज्ञान तथा प्रविधिमन्त्री : सस्मित पोखरेल
कानुन, न्याय तथा संसदीय मामिलामन्त्री : सोविता गौतम
पर्यटन, संस्कृति तथा नागरिक उड्डयनमन्त्री : सुधन गुरुङ
श्रम, रोजगार तथा सामाजिक सुरक्षामन्त्री : यज्ञमणि न्यौपाने
युवा तथा खेलकुदमन्त्री : बल्लु गुप्ता
स्वास्थ्य तथा जनसङ्ख्या मन्त्री : तोसिमा कार्की

मन्त्रालय तोकिने बाँकी : दीपक बोहरालाई दोस्रो मन्त्रीको रूपमा समेत उल्लेख गरिएको छ, जसलाई अन्तिम रूप दिँदा मन्त्रालय तोकिन बाँकी छ । आशिका तामाङले मन्त्री बन्न निकै लबिङ गरिरहेको भए पनि उहाँको नाममा कुनै निर्णय नभएको स्रोतले स्पष्ट पारेको छ ।

सभामुख र उपसभामुखमा सहमति

बालेन र रविबीचको सहमतिमा संसद्को सभामुखमा पूर्वउपसभामुख इन्दिरा रानामगरको नाम तय भइसकेको छ । उपसभामुख भने अझै अनिर्णीत छ । प्रमुख प्रतिपक्षी नेपाली कांग्रेसलाई दिने कि अर्को प्रतिपक्ष नेकपालाई दिने भन्नेमा छलफल जारी छ ।

स्रोतका अनुसार मन्त्रिपरिषद्का प्रस्तावित सदस्यहरूको नाम पूर्व स्वीकृतिका लागि शक्ति केन्द्रमा पठाइएको थियो र सबैबाट स्वीकृति प्राप्त भइसकेको छ । एक प्रस्तावित मन्त्रीका अनुसार, पहिलो दिनदेखि नै काम थाल्ने गरी कार्ययोजना बनाउन र निजी सचिवालयको टिम छनोट गर्न भनिसकिएको छ ।

बालेनको सचिवालय टिम तयार

प्रधानमन्त्री बालेनले आफ्नो मन्त्रिपरिषद् सचिवालयका लागि आफ्ना पूर्ण सहयोगी कुमार व्यञ्जनकार, भूपदेव शाह र प्रदीप परियारलाई जिम्मेवारी दिइसकेका छन् । यसैगरी टिम बालेनमा सामेल हुन पूर्व सल्लाहकार गोविन्द नारायण ९सुशील कार्की निकटले पनि प्रयास गरिरहेको बुझिएको छ ।

बालेन टिमले अहिले मन्त्रालयहरू गाभेर १५ बनाउने कि १८ मा राख्ने भन्नेमा अन्तिम गृहकार्य गरिरहेको छ । मन्त्रालयको संख्या र सम्मिलन टुंगिएपछि केही मन्त्रीको विभाग र जिम्मेवारीमा सामान्य फेरबदल हुन सक्ने सम्भावना पनि रहेको बताइएको छ । यो सहमतिपछि रास्वपाको १५ सदस्यीय मन्त्रिपरिषद् नेपालको राजनीतिक इतिहासमा नयाँ प्रयोग बन्ने देखिन्छ । युवा, प्राज्ञिक र स्वतन्त्र छविका व्यक्तिहरूको बाहुल्य रहेको यो टिमले ‘काम गर्छौं, कुरा गर्दैनौं’ भन्ने बालेनको पुरानो शैलीलाई निरन्तरता दिने अपेक्षा गरिएको छ ।