रुपन्देही । पूर्व-पश्चिम राजमार्गअन्तर्गत नवलपसस्थित विनयी खोलाको दुम्कीबासमा पुल भाँचिएपछि पूर्वपश्चिम राजमार्गमा हिंड्ने सयौं यातायातका साधनमा सर्वसाधारण अलपत्र परेका छन् । मुख्य राजमार्ग बन्द भएपछि अहिले प्रशासनको सहयोगमा दुई वटा वैकल्पिक बाटो प्रयोग गराउन थालिएको छ ।
विजयी त्रिवेणी गाउँपालिका–२ ज्यामिरेबाट भित्री बाटो त्रिवेणी चोक हुँदै गुम्बाचोकबाट राजमार्गमा निस्कने एउटा रुट प्रयोग भएको छ । जुन रुट अहिले चलिरहेको राजमार्गभन्दा ५ किलोमिटर लामो पर्न जान्छ ।
त्यस्तै, ठूला सवारी साधन ज्यामिरे पेट्रोलपम्प हुँदै सिजीचोक, डाँडाचौर, होङ्सि गेटमा पुग्ने अर्को बाटो प्रयोग गरिएको छ । उक्त बाटो १८ किलोमिटर लामो पर्नजाने अवरुद्ध सवारी आवागमनका लागि वैकल्पिक बाटोको प्रयोग गर्न थालिएको नवलपुरका डिएसपी जेशी शाहले नेपाल प्रेसलाई बताए । उनका अनुसार भाँचिएको पुल नजिकै अर्को एउटा डाइभर्सनबाट पनि सवारी आवागमन गराइएको छ । उक्त रुटबाट भने ६ पांग्रे सवारी साधन मात्रै ओहोरदोहोर भइरहेका छन् ।
लरीबाहेक सबै साधनलाई वैकल्पिक बाटोबाट हिंड्ने व्यवस्था मिलाइएको छ, रातीको समय भएकाले सबै चालकहरुले विशेष ध्यान दिनुपर्नेछ’ उनले भने । शुक्रबार साँझ साढे ५ बजेतिर भारतीय हेबी ट्रक एन एल ०१ ए एच ५१७९ नम्बरको ट्रक पुलबाट पास हुने क्रममा पुल एक्कासी भाँचिएपछि यातायात अवरुद्ध भएको हो ।
पूर्वी नवलपरासीमा रहेकामध्ये विनयी खोला पुल सबैभन्दा लामो हो । बुधबारदेखि यो राजमार्गको दाउन्ने क्षेत्रमा शीतलहरले लामो समय बाटो अवरुद्ध बनेकोमा शुक्रबार घाम लागेपछि सहज भएको थियो ।
यसैबीच भौतिक पूर्वाधार तथा यातायातमन्त्री देवेन्द्र दाहालले दुम्कीबासको यातायात तुरुन्तै सञ्चालनमा ल्याउन सडक विभागलाई निर्देशन दिएका छन् ।
शुक्रबार साँझ दुम्कीबासमा पुल भाँचिएका कारण अवरुद्ध हुन पुगेको यातायात लाई डाइभर्सन निर्माण गरी अविलम्ब सञ्चालनमा ल्याउन उनले निर्देशन दिए । बढी भार भएका सवारीसाधनको जाँच कडा बनाउनु पर्नेमा उनले जोड दिएका छन् । उक्त स्थानमा अस्थायी व्यवस्था गरेर भए पनि सडक खुलाउन मन्त्री दाहालले निर्देशन दिएका हुन् ।
