काठमाडौं । गीतकार डब्बु क्षत्रीको अर्को गीत ‘तिमीसँग बोल्न मन लाग्यो’ सार्वजनिक भएको छ । डब्बुको गत महिनामात्रै ‘बजाई देउन बाजा’ बोलको गीत आएको थियो । एक महिना नपुग्दै गीतकार डब्बुले नयाँ आधुनिक गीत ‘तिमीसँग बोल्न मन लाग्यो’को भिडियो सार्वजनिक गरेका हुन् ।

गीतका डब्बुका अनुसार यो गीत सात वर्षअघि रेकर्ड गरिएको थियो । तर, यसको भिडियो बनेको थिएन । त्यतिबेला डब्बु क्षत्रीको गीतिसँग्रह ‘गुलाबी स्वरहरु’मा यो गीत समेटिएको छ । यसलाई यतिबेला रि–मिक्सिङ गरेर भिडियोको रुपमा बजारमा ल्याइएको उनले बताए । यो गीतको रचनासँगै भिडियोको निर्देशन पनि डब्बुले गरेका छन् । ‘पुन मिक्सिङ गरेर हामीले यसलाई ल्याएका हौं । गीत अनुसारको भिडियो बनाइएको छ’ गीतकार डब्बु क्षत्रीले भने ।

यो गीतमा गायिका केन्जुमा सुब्बाको स्वर रहेको छ । बिन्ध्यवासिनी म्युजिकको आधिकारिक युट्युव च्यानलबाट यो गीतको भिडियोलाई सार्वजनिक गरिएको हो । यसअघि निकै सुनिएको गीतलाई भिडियोमा ल्याउँदा खुसी लागेको गायिका केन्जुमा सुब्बाले बताइन् । संगीतकार जुगल डँगोलको संगीत छ । गीतमा संगीत संयोजन पनि जुगलकै हो ।

गीतमा युगल जोडीको प्रेम आसक्तिको वयान गरेकाले भिडियोमा पनि सोही भावलाई समेटिएको गीतकार डब्बु क्षत्रीले बताएका छन् । भिडियोमा ब्युटिसियन ट्यालेन्ट नेपाल २०२४ की विजेता शर्मिला बुढाथोकी र अभिनेता यसराज गराचले अभिनय गरेका छन् । यी दुईको अभिनय राम्रो छ । नयाँ भएर पनि शर्मिलाको अभिनयमा परिपक्ता देखिएको छ ।

यो गीतको भिडियोलाई सर्लाहीको बागमती र नुनथर क्षेत्रमा छायाँकन गरिएको हो । सो क्षेत्रको प्राकृतिक सुन्दरता र कलाकारको कुशल अभिनयले भिडियो राम्रो बनेको प्रतिक्रिया दर्शकबाट आएको छ । ४२ डिग्रीको तापक्रममा यो गीतको भिडियो छायाँकन गरिए पनि कलाकार र प्राविधिकले पनि राम्रो काम गरेको उनले बताए ।