काठमाडौं । दक्षिण अफ्रिकामा जारी आईसीसी यू–१९ विश्वकप क्रिकेटमा नेपाल सुपर सिक्समा पुगेको छ । समूह चरणको अन्तिम खेलमा बिहीबार अफगानिस्तानलाई एक विकेटले पराजित गर्दै नेपाल सुपर सिक्समा प्रवेश गरेको हो ।

अफगानिस्तानले दिएको १ यस ४६ रनको लक्ष्य नेपालले ४४ ओभरमा ४ बलमा ९ विकेट गुमाएर पूरा गरेको थियो । समूह डि मा रहेको नेपाल २ हार र एक जितसहित २ अंकसहित तेस्रो स्थानमा रहँदै सुपर सिक्समा पुगेको हो । उक्त समूहबाट नेपालसहित पाकिस्तान र न्यूजिल्यान्ड यसअघि नै सुपर सिक्समा स्थान पक्का गरेका छन् । शनिबार हुने पाकिस्तान र न्यूजिल्यान्डबिचको खेलबाट समूह विजेता, उपविजेताको टुंगो लाग्नेछ ।

यस विश्वकपमा नेपालसहित ४ समूहका ३–३ गरी १२ टिम सुपर सिक्समा पुग्नेछन् । सुपर सिक्समा समूह ए र डी अर्थात समूह बी र सीमा रहेका टिमबिच प्रतिस्पर्धा हुनेछ ।

नेपालसहित समूह डीमा रहेका टिमले सुपुर सिक्समा समूह ए का राष्ट्रसँग प्रतिस्पर्धा गर्नेछन् । समूह ए मा भारत, बंगलादेश, आयरल्याण्ड र अमेरिका छन् । उक्त समूहबाट भारत र बंगलादेश सुपर सिक्स खेल्नेछन् । तेस्रो टोलीको टुंगो शनिबार हुने खेलले लाग्नेछ ।

सुपर सिक्समा समूह ए को विजेताले समूह डिको दोस्रो र तेस्रो टिमसँग खेल्नेछ । उपविजेता हुने टिमले अर्को समूहको पहिलो र तेस्रो अर्थात समूह चरणमा तेस्रो हुने टिमले सुपर सिक्समा अर्को समूहको पहिलो र दोस्रो टिमसँग प्रतिस्पर्धा गर्नेछ ।
नेपाल समूह डी बाट तेस्रो टिमको रुपमा सुपर सिक्समा प्रवेश गरेको हो । नेपालले सुपर सिक्स समूह ए को विजेता र उपविजेतासँग प्रतिस्पर्धा गर्नेछ ।

समूह ए बाट भारत र बंगलादेश विजेता र उपविजेताका रुपमा सुपर सिक्समा प्रवेश गरेका छन् । यी टिममध्ये विजेता, उपविजेताको छिनोफानो शनिबार हुनेछ । यससँगै नेपालले सुपर सिक्समा भारत र बंगलादेशको सामना गर्नेछ । नेपालले सुपर सिक्सको पहिलो खेल जनवरी ३१ मा समूह ए को उपविजेता र फेबु्रअरी २ मा समूह विजेतासँग प्रतिस्पर्धा गर्नेछ ।