काठमाडौं, ३० चैत (एजेन्सी) । नेपालमा लुकेर बसेको भनिएका भारतीय ‘ग्याङस्टार’ अतीक अहमदका छोरा असद र उनका सुटर गुलाम मोहम्मदको उत्तर प्रदेश (युपी) प्रहरीले ‘इनकाउन्टर’ गरेको छ ।

बिहीबार उत्तर प्रदेशको झाँसीमा प्रहरीले उनीहरुलाई इन्काउन्टर गरेको हो । डीआईजी अनन्त देव तिवारीका अनुसार उनीहरूबाट पिस्तोल, रिभल्वर र विदेशी हतियार पनि बरामद भएको छ ।

उत्तर प्रदेशका विधायक उमेश पालको हत्या गरेको आरोपमा उनीहरूलाई प्रहरीले खोजी गरिरहेको थियो । सीमा जोडिएका कारण यी दुवै भागेर नेपाल प्रवेश गरेको खबरहरु पनि प्रकाशित भएका थिए ।

युपी सरकारले दुवैको सूचना दिने व्यक्तिलाई ५–५ लाख रुपैयाँ इनाम घोषणा पनि गरेको थियो। २४ फेब्रुअरीमा प्रयागराजमा उमेश पालको हत्या भएको थियो । हत्या विरोधमा मुख्यमन्त्री योगी आदित्यनाथ सरकारविरूद्ध आक्रोश व्यक्त भएको थियो ।

प्रहरीका अनुसार उमेश पालको हत्यापछि असद अहमद लखनउ भागेका थिए । उनी पछि दिल्ली पुग्नुअघि कानपुर र मेरठ गए । त्यसपछि उनले मध्यप्रदेश भाग्ने निर्णय गरे । मोटरसाइकलमा राज्यको सीमातर्फ जाँदै गर्दा प्रहरीले उनलाई झाँसीमा इन्काउन्टर गरेको बताइएको छ ।