काठमाडौं, १७ फागुन । भारतले खाना पकाउने एलपीजी ग्यासको मूल्य बढाएर पठाएको छ । इण्डियन आयल कर्पोरेशन (आईओसी)ले बुधबार पठाएको नयाँ मूल्यसूची अनुसार एलपी ग्यासको मूल्य प्रतिलिसिन्डर ३३९ रुपैयाँले बढेर आएको हो ।

एलपीजी ग्यासको मूल्य ३३९ रुपैयाँले बढेसँगै खरिद लागत प्रतिसिलिन्डर २४३५ रुपैयाँ पुगेको छ । हाल नेपाल आयल निगमले प्रतिसिलिन्डर १८ सय रुपैयाँमा एलपी ग्यास बिक्री गर्दै आइरहेको छ ।

ग्यासबाहेक अन्य सबै पेट्रोलियम पदार्थको मूल्य भने घटेर आएको छ । नयाँ मूल्यसूचीअनुसार पेट्रोलको मूल्य प्रतिलिटर १.२१ रुपैयाँ घटेको छ भने डिजेलको मूल्य प्रतिलिटर ५.०५ रुपैयाँ, हवाई इन्धनको मूल्य ७ रुपैयाँ प्रतिलिटर र मट्टितेलको मूल्य प्रतिलिटर ३.४० रुपैयाँ घटेको छ ।