ललितपुर, १२ असार । ललितपुर महानगरपालिकाले पानीपुरी र चटपट बेच्न रोक लगाएको छ ।

पानीपुरी बनाउन प्रयोग गरिएको पानीमा हैजाको जिवाणु भेटिएको भन्दै महानगरले आजदेखि पानीपुरी र चटपट बिक्री वितरण गर्न प्रतिबन्ध लगाएको हो ।

पानीपुरी नबेच्न आग्रह गर्दै नगर प्रहरीले आइतबार माइकिङ गरेर जानकारी दिइरहेका छन् । र कसैले पानीपुरी र चटपटे बिक्री वितरण गरेको पाइएमा कारबाहीको चेतावनी पनि दिएको छ ।

नगर प्रहरी प्रमुख सीताराम हाथेछुका अनुसार पानीपुरीमा प्रयोग गरिने पानी दूषित र हैजाका जीवाणु मिसिएको हुन सक्ने भएकोले बिक्री वितरणमा रोक लगाउनुपरेको हो । यस्तै रेष्टुरेन्ट र होटलमा राखिएको पानीपुरी पनि बेच्न नदिने बताए ।

यसअघि काठमाडौंको बागबजार क्षेत्रमा बसोबास गर्ने दुई जनामा हैजाको जीवाणु देखिएको थियो । त्यस क्षेत्रका पानीका स्रोतमा हैजाको जीवाणु रहेको पाइएको थियो ।