काठमाडौं, ३ फागुन । वरिष्ठ साहित्यकार तारानाथ शर्माको ८७ वर्षको उमेरमा आज(मंगलबार) निधन भएको छ ।

ताना शर्माका नामशबाट लोकप्रिय उनी विसं १९९१ असार ९ गते इलामको बरबोटमा जन्मिएका थिए । उनले ‘झर्राेवादी आन्दोलन’का एक अगुवा हुनाका साथै नियात्रा, निबन्ध, कथा, उपन्यास, समालोचनालगायत विधामा दर्जनौँ कृति लेखेका थिए ।

डा शर्माले ‘बेलायततिर बरालिँदा’ नियात्राका लागि विसं २०२६ मा मदन पुरस्कार र ‘सम र समका कृति’का लागि २०२९ मा साझा पुरस्कार प्राप्त गरेका थिए । उनलाई नेपाल प्रज्ञाप्रतिष्ठानले आजीवन सदस्यतासमेत दिएका थिए ।

उनी पाठ्यपुस्तक लेखक पनि थिए । नेपाल प्रज्ञा प्रतिष्ठानका सदस्यसचिव प्रा जगत्प्रसाद उपाध्यायले दिवङ्गत शर्माको निधनबाट नेपाली वाङ्यमयको क्षेत्रमा अपूरणीय क्षति पुगेको बताए । शर्माको अन्त्येष्टि आज पशुपति आर्यघाटमा गरिने जनाइएको छ ।