काठमाडौं, १२ पुष । एभिसी एसियन सेन्ट्रल जोन महिला तथा पुरूष भलिबल च्याम्पियनसिपमा नेपाली महिला टिलीले लगातार पाँचौ खेलमा जित हासिल गर्दै फाइनल प्रवेश गरेको छ ।

सोमबार बंगलादेशको राजधानी ढाकामा भएको समूहको अन्तिम खेलमा नेपालले किर्गिस्तानलाई ३–० को सोझो सेटमा जितेको हो । नेपालले किर्गिस्तानलाई पहिलो सेट २५–८, दोस्रो सेट २५–१४ र तेस्रो सेटमा नेपाल २४–१७ अङ्कले विजयी भएको हो ।

अब नेपालले भोली मंगलबार उपाधिका लागि उज्वेकिस्तानसँग भिड्नेछ । उज्वेकिस्तानले सोमबार नै श्रीलंकामाथि ३–२ को रोमाञ्चक जित निकाल्दै फाइनलमा स्थान बनाउन सफल भएको थियो । मंगलबारै श्रीलंका र किर्गिस्तानबीच तेस्रो स्थानको लागि प्रतिस्पर्धा हुनेछ । नेपालले यसअघि बंगलादेश, माल्दिभ्स, श्रीलंका र उज्वेकिस्तानलाई पराजित गर्दै फाइनलमा स्थान बनाएको थियो ।

यस्तै, पुरुषतर्फ नेपालले दुई खेलमा जित र दुई खेलमा हार बेहोरेको छ । आइतबार नेपालले माल्दिभ्सलाई हराएको थियो । पुरुषतर्फ नेपाल, बंगलादेश, उज्वेकिस्तान, श्रीलंका र माल्दिभ्स गरी ५ टिमबीच प्रतिस्पर्धा भइरहेको छ ।