काठमाडौँ । इरानमा युद्ध सुरु भएयता एक हजारभन्दा बढी सर्वसाधारणको ज्यान गएको मानव अधिकारवादी संस्थाले जनाएको छ ।

अमेरिकास्थित मानव अधिकार कार्यकर्ता समाचार संस्था (एचआरएएनए) का अनुसार शनिबारदेखि सुरु भएको युद्धपछि हालसम्म कम्तीमा १ हजार ९७ जना सर्वसाधारण मारिएका छन् । ज्यान गुमाउनेमध्ये १८१ जना बालबालिका रहेका छन् ।

संस्थाले मंगलबार दिउँसोसम्मको विवरण सार्वजनिक गर्दै ५ हजार ४ सयभन्दा बढी सर्वसाधारण घाइते भएको जनाएको छ । घाइतेमध्ये करिब १०० जना बालबालिका रहेका छन् ।

एचआरएएनएले सार्वजनिक गरेको तथ्यांक प्रारम्भिक भएको उल्लेख गर्दै थप सयौं मृत्युका घटनाबारे पुष्टि गर्ने काम भइरहेको जनाएको छ ।

कतारमा इरानी सेनाका १० संदिग्ध जासुस पक्राउ

यसैबीच कतारले इरानको इस्लामिक रिभोल्युशनरी गार्ड कोर्प्स (आईआरजीसी) सँग सम्बन्धित १० जना संदिग्ध जासुसलाई पक्राउ गरेको जनाएको छ ।

कतारको सरकारी समाचार संस्थाका अनुसार बुधबार बिहानै सुरक्षा निकायले आईआरजीसीका लागि काम गरिरहेका दुई समूहलाई सफलतापूर्वक नियन्त्रणमा लिएको हो । पक्राउ परेकामध्ये सात जनालाई देशका महत्वपूर्ण र सैन्य पूर्वाधारसम्बन्धी सूचना संकलन गर्ने जिम्मेवारी दिइएको बताइएको छ ।

त्यस्तै, अन्य तीन जना संदिग्धलाई ड्रोन प्रयोगसम्बन्धी तालिम दिइएको आरोप लगाइएको छ ।

सरकारी समाचार संस्थाका अनुसार अनुसन्धानका क्रममा उनीहरूले आफूहरू इरानी रिभोल्युशनरी गार्डसँग सम्बन्धित रहेको स्वीकार गरेका छन् । साथै उनीहरूलाई जासुसी तथा विध्वंसात्मक गतिविधि सञ्चालन गर्ने जिम्मा दिइएको बयान दिएको जनाइएको छ ।