काठमाडौं । नेपाली बजारमा आज मंगलबार पनि सुनको मूल्य घटेको छ । सोमबार १५ हजार ९ सयले घटेको सुन मंगलबार २६ सय रुपैयाँले घटेको हो ।

नेपाल सुन चाँदी व्यवसायी महासंघका अनुसार आज मंगलबार २६ सय रुपैयाँले घटेर प्रतितोला सुनको मूल्य १ लाख ४८ हजार ७०० रुपैयाँ कायम भएको छ ।

सुनको मूल्य घटेसँगै चाँदी पनि ओरालो लागेको छ । आज २५ रुपैयाँले घटेर प्रतितोला चाँदीको मूल्य १ हजार ८२० रुपैयाँ निर्धारण भएको छ । अघिल्लो दिन प्रतितोला चाँदी १ हजार ८४५ रुपैयाँमा कारोबार भएको थियो ।

सरकारले भन्सार दर घटाएपछि स्थानीय बजारमा सुन–चाँदीको भाउ घटेको हो । सुनको भन्सार दर २० बाट १० प्रतिशत कायम गरिएको छ ।

यसअघि सुन आयातमा सरकारले २० प्रतिशत कर लिँदै आएको थियो। यसैगरी चाँदीको भन्सार दर १५ प्रतिशतबाट १० प्रतिशतमा झरेको छ ।