काठमाडौं । नेपाली बजारमा आइतबार सुनको मूल्यले पुनः नयाँ रेकर्ड कायम गरेको छ । केही दिनयता लगातार नयाँ रेकर्ड बनाइरहेको सुनको मूल्य आज हालसम्मकै उच्च विन्दुमा पुगेको हो ।

गत बुधबारदेखि सुनको मूल्उले नयाँ रेकर्ड बनाइरहेको छ । यसअघि शुक्रबार हालसम्मकै उच्च मूल्यमा सुनको कारोबार भएको थियो । नेपाल सुन चाँदी व्यवसायी महासंघका अनुसरा उक्त दिन सुन प्रतितोला एक लाख ६४ हजार चार सय रूपैयाँमा कारोबार भएको थियो । आइतबार प्रतितोला सुनको मूल्य ६ सय बढेको छ । यससँगै आज सुन प्रतितोला एक लाख ६५ हजार रूपैयाँ पुगेको छ ।

यस्तै, आइतबार चाँदीको मूल्य पनि अघिल्लो दिनको तुलनामा बढेको छ । आज चाँदीको मूल्य प्रतितोला दुई हजार ७५ रूपैयाँ पुगेको नेपाल सुनचाँदी व्यवसायी महासंघले जनाएको छ । शुक्रबार चाँदी प्रतितोला एक हजार नौ सय ८० रूपैयाँमा कारोबार भएको थियो । यो मूल्य अघिल्लो दिनको तुलनामा प्रतितोला ९५ रूपैयाँ बढेको हो ।