काठमाडौं । राष्ट्रिय स्वतन्त्र पार्टी (रास्वपा)का सभापति तथा पूर्वगृहमन्त्री रवि लामिछाने पक्राउ परेका छन् । शुक्रबार साँझ नेपाल प्रहरीको केन्द्रीय अनुसन्धान ब्यूरो (सीआईबी)को टोलीले उनलाई पार्टी कार्यालय वनस्थलीबाट पक्राउ गरेको हो ।
काठमाडौंबाट पक्राउ परेका लामिछानेलाई प्रहरीले आजै कास्की लगेको छ । सभापति लामिछानेविरुद्ध कास्की प्रहरीमा उजुरी परेकाले उनलाई पोखरा लगिएको हो ।
पोखराको सूर्यदर्शनसमेतका ७ सहकारीबाट ६५ करोड रुपैयाँ गोर्खा मिडिया नेटवर्कमा गएको अनुसन्धानबाट खुलेको छ ।
सूर्यदर्शन सहकारी ठगी प्रकरणमा कास्की प्रहरीको प्रतिवेदनका आधारमा १६ असोज २०८० मै गितेन्द्रबाबु (जिबी) राई, कुमार रम्तेलसहित १९ जनाविरुद्ध मुद्दा दर्ता भएको थियो । त्यसमा एक अर्ब ११ करोड रुपैयाँ बिगो मागदाबी गरिएको थियो ।
२२ माघ २०८० मा सभापति लामिछानेसहित १८ जनाविरुद्ध कास्की प्रहरीमा फेरि पुरक जाहेरी परेको थियो । एमाले सांसद् सूर्य थापाको नेतृत्वमा १५ जेठमा सहकारी समस्याबारे छानबिन गर्न एमाले सांसद् सुर्य थापाको नेतृत्वमा संसदीय विशेष समितिले लामिछानेमाथि पनि अनुसन्धान गर्नुपर्ने सुझाबसहित ४ असोज २०८१ मा प्रतिवेदन बुझाएको थिए ।
प्रतिवेदनलाई कार्यान्वयन गर्ने मन्त्रिपरिषद्को निर्णयसँगै कास्की प्रहरीले यो मामलामा अनुसन्धान अघि बढाएको थियो ।
संगठित अपराधमा पनि अनुसन्धान गरिने
रास्वपा सभापति लामिछानेविरुद्ध सहकारी ठगीका साथै संगठित अपराधमा पनि अनुसन्धान गरिने भएको छ । जिल्ला प्रहरी कार्यालय कास्कीका अनुसार दुवै अपराधमा अनुसन्धानका लागि अनुमति लिइएको जानकारी दिएको छ ।
सोही आधारमा कास्की प्रहरीले लामिछानेलाई पार्टी कार्यालयबाट पक्राउ गरेर पोखरा लगिएको हो । कास्की जिल्ला अदालतले प्रहरीलाई आज शुक्रवार नै पक्राउको अनुमति दिएको हो ।
सूर्यदर्शन सहकारीको संस्थापक अध्यक्ष गीतेन्द्रबावु (जीबी) राईसँग मिलेर लामिछानेले गोर्खा मिडिया नेटवर्कमा रकम ल्याएर अपचलन गरेको मुद्दामा जिल्ला प्रहरी कार्यालय कास्कीले अनुसन्धान गरिरहेको छ ।
