काठमाडौं, २९ भदौं । गायिका अनिला राईले ‘बादलसँगै’ बोलको आफ्नो गीतको भिडियो विश्वकै प्राकृतिक रुपमा सुन्दर देश स्वीजरल्याण्डका छायाँकन गरेकी छन् । उक्त गीतको भिडियोलाई उनले आफ्नै अफिसियल युट्युब च्यानल ‘अनिला राई अफिसियल’मार्फत हालै सार्वजनिक गरेकी हुन् ।
बेलायतलाई कर्मथलो बनाउँदै आएकी अनिला नेपाली गीतसंगीत क्षेत्रमा पनि सक्रिय रहँदै आएकी छन् । हालैका दिनमात्र उनका झण्डै एएक दर्जन गीतको भिडियो शृँखलावद्ध रिलिज भएको थियो । यसैबेला अनिलाले स्वीजरल्याण्ड घुम्न गएको मौकामा ‘बादलसँगै’ गीतको भिडियो निर्माण गरेकी हुन् ।
गायिका अनिला केही साताअघि परिवारसहित स्वीजरल्याण्ड घुम्न गएकी थिइन् । सोही मौकामा ‘बादलसँगै’ गीतको भिडियो निर्माण गरेको अनिलाले बताइन् । भिडियोमा स्वीजरल्याण्डको रमणीय दृश्यहरु कैद गरिएको छ । जुन भिडियो हेरिरहँदा स्वीजरल्याण्ड नै पुगेको आभाष हुन्छ ।
यसअघि ‘बादलसँगै’ गीतको भिडियो नेपालको दोलखास्थित सैलुङ डाँडामा छायाँकन गरिएको थियो । जुन भिडियो दर्शकले निक्कै रुचाएका थिए । गायिका अनिलाले भनिन्, ‘स्वीजरल्याण्ड घुम्न गएको बेला मेरो केही गीतको भिडियो बनाएकी हुँ, अरु गीतको पनि भिडियो बनाएकी छु । ती भिडियो विस्तारै रिलिज गर्दै जानेछु ।’
गायिका अनिलाको ‘स्वरांकन’ एल्बममा समेटिएको ‘बादलसँगै’ गीतमा अनिलाकै शब्दरचना रहेको छ भने संगीत शान्तिराम राईको रहेको छ । यस भिडियोको छायाँकन तथा निर्माण नन्दराज राईले गरेका हुन् ।
