काठमाडौं, २५ पुस । नेपाल आयल निगमले हवाई इन्धनको मूल्य घटाएसँगै आन्तरिक हवाई भाडा पनि घट्ने भएको छ ।
निगमले आन्तरिक हवाई इन्धनको मूल्य २० रुपैयाँ घटाएसँगै हवाई भाडा पनि घटेको वायुसेवा सञ्चालक संघले जनाएको हो । घटेको हवाई भाडा पुस २७ गतेदेखि लागू हुने वायुसेवा संघले जनाएको छ ।
परिमार्जित भाडादरमा सबैभन्दा धेरै भाडा घट्नेमा काठमाडौं–धनगढी रुटमा ८८५ रुपैयाँ रहेको छ भने कम भाडा दर घट्नेमा काठमाडौं–सिमरा रुटमा १८० रुपैयाँ घटाइने भएको छ ।
नेपाल आयल निगम सञ्चालक समितिको आइतबार बसेको बैठकले हवाई इन्धन आन्तरिकतर्फ २० र बाह्यतर्फ करिब ३० रुपैयाँ घटाउने निर्णय गरेको थियो । नयाँ मूल्यअनुसार हवाई इन्धन आन्तरिकतर्फ प्रतिलिटर १७० रुपैयाँ पर्नेछ ।
त्यस्तै, हवाई इन्धन बाह्यतर्फ प्रतिलिटर १८७ रुपैयाँ ८५ पैसा (१.४२ अमेरिकी डलर) पर्ने जनाएको छ । हवाई इन्धनको मूल्य भारी घटे पनि निगमलाई अझै आन्तरिकतर्फ लिटरमा २० र बाह्यतर्फ ७० रुपैयाँ नाफा छ ।
हेर्नुहोस् हवाई भाडामा कति घट्यो ?
