काठमाडौं, १२ पुस (एजेन्सी) । भारतीय अभिनेता सुशान्त सिंह राजपुतको हत्या भएको दाबी गरिएको छ । प्रहरीले उनको मृत्युलाई आत्महत्या भन्दै मुद्दा बन्द गरिदिए पनि घटनाको एउटा नयाँ खबर बाहिर हो ।

भारतीय सञ्चारमाध्यमका अनुसार कुपर अस्पतालमा सुशान्तको पोस्टमार्टम गर्दा त्यहाँ उपस्थित एक कर्मचारी रुपकुमार साहले सुशान्तको हत्या भएको दाबी गरेका छन् । सुशान्तको शव पोस्टमार्टमका लागि ल्याइँदा उनको घाँटी र शरीरका केही भागमा चोटको निशान रहेको उनले बताए ।

साहले भारतीय सञ्चार माध्यमहरुसँग भनेका छन्, ‘सुशान्त सिंह राजपुतको मृत्यु हुँदा हामीले कुपर अस्पतालमा पाँच वटा शव प्राप्त गरेका थियौं । हामीलाई भनियो कि यी शवहरु मध्ये एक भीआइपी शव हो । पोष्टमार्टम गर्न गएपछि थाहा भयो यो शव सुशान्त सिंह राजपूतको थियो ।’

उनले थप भने, ‘जब मैले पहिलो पटक सुशान्तको शव देखेँ, मैले तुरुन्तै वरिष्ठलाई यो आत्महत्या नभएर हत्या भएको बताए । तर मेरा वरिष्ठहरूले मलाई यसबारे पछि कुरा गर्छु भने । उनले जतिसक्दो चाँडो शवको तस्विर खिचेर प्रहरीलाई दिन भने । त्यसैले हामीले राति नै पोष्टमार्टम गर्यौं ।’

साहका अनुसार सुशान्तको पोस्टमार्टमको भिडियो रेकर्डिङ देखाउन कुनै अनुमति दिइएको थिएन । त्यसैले अन्तिम समयमा सुशान्तको शवको अवस्थाको कुनै प्रमाण नभएको उनले बताए ।

यस विषयमा सुशान्तका वकिल विकास सिंहको प्रतिक्रिया दिएका छन् । उनले भने, ‘सुशान्तको शरीरमा चोटका निशान थिए वा थिएनन् यसबारेमा म स्पष्टसँग केही भन्न सक्दिन । तर म भन्छु सुशान्तको मृत्युको कारण साधारण आत्महत्या थिएन । यसका पछाडि पक्कै कुनै न कुनै षड्यन्त्र थियो । अब ,सीबीआईले मात्रै यो समस्या समाधान गर्न सक्छ ।’

सुशान्त सिंह राजपूत १४ जुन, २०२० मा बान्द्रा स्थित उनको घरमा रहस्यमय रूपमा मृत फेला परेका थिए । सुरुमा यो घटना आत्महत्या भएको देखिए पनि पछि मिडिया र विपक्षी दलको दबाबका कारण घटनाको अनुसन्धान सीबीआईलाई सुम्पिएको थियो । सीबीआईको पछिल्लो प्रतिवेदनमा मृत्युको वास्तविक कारण आत्महत्या भनिएको थियो ।