काठमाडौं, ३० असोज । वाङ्मय शताब्दी पुरूष सत्यमोहन जोशीको शरीरलाई नजलाउने निर्णय भएको छ । यसअघि नै मृत्युपछि आफ्नो शरीर दानगरिसकेका जोशीको शरीर अध्ययनका लागि केमिकल प्रयोग गरेर राखिने भएको हो ।
किष्ट अस्पतालमा परिवार, महानगर र अस्पताल प्रशासनबीच आइतबार भएको छलफलपछि जोशीको शरीर नजलाउने निर्णय गरेको हो ।
आइतबार बिहान १०३ वर्षको उमेरका निधन भएका जोशीको शवलाई अन्तिम श्रद्धाञ्जलीका लागि ललितपुर महानगरपालिका परिसरमा राखिने भएको छ ।
शवमा नसाबाट केमिकल राखेपछि अन्तिम श्रद्धाञ्जलीका लागि महानगरपरिसरमा राखिने निर्णय भएको अस्पतालका प्रोफेसर डाक्टर किशोर सिंह बस्नेतले जानकारी दिए ।
उनले भने, ‘आज अन्तिम श्रद्धाञ्जलीका लागि महानगर परिसरमा शरीर राख्नेछौँ । त्यसपछि शरीर नगल्ने केमिकल प्रयोग गरेर उहाँको शरीर अध्ययनका लागि राख्नेछौँ ।’
अस्पतालले जोशीको शरीर कसरी राख्ने भन्नेबारे विस्तृतमा अध्ययन गरिसकेकाले उनकै इच्छाअनुसार शरीर अध्ययनका लागि राखिने उनले बताए ।
किष्ट अस्पतालमा भएको छलफलमा जोशीका कान्छा छोरा डाक्टर पूर्णराज जोशीले आफूहरूको इच्छा परम्पराअनुसार अन्त्येष्टि गर्ने भएपनि बाबुको इच्चालाई मान्न तयार भएको बताए ।
