काठमाडौं, १९ असार । गायिका जशोदा सुब्बाद्वारा स्वरबद्ध नयाँ गीत सार्वजनिक भएको छ । जशोदा र राजेश चौधरीको युगल स्वर रहेको ‘हेर्न मन लाग्छ’ बोलको गीतको भिडियो शनिबार सार्वजनिक गरिएको हो ।

डाक स्टुडियो नामक युट्युब च्यानलमार्फत सार्वजनिक गरिएको गीतमा शब्दरचना कुमार श्रेष्ठ र संगीत संयोजन बाबु प्रधानको रहेको छ । यस गीतको संगीत भने देव स्याङ्तेनले गरेका हुन् ।

‘हेर्न मन लाग्छ’ गीतको यस भिडियोमा बालमस्तिकबाट हुने प्रेमलाई स्मरण गर्न खोजिएको छ । निमा लामाको निर्देशन रहेको भिडियोमा दीपक लामा, मञ्जु श्रेष्ठ, रेनुका पाख्रिन, रुपेश श्रेष्ठ, लक्ष्मण कुँवर, सुमन तामाङ र डवित तामाङले अभिनय गरेका छन् । भिडियोमा अन्तिममा गायक÷गायिकालाई पनि प्रस्तुत गरिएको छ ।

अदिप कुलुङ राईले खिचेको यस भिडियोलाई विश्वास भण्डरीले सम्पादन गरेका हुन् । भिडियो समग्रमा उत्कृष्ट बनेको छ ।
गायिका जशोदा सुब्बाको यो पछिल्लो गीत हो । प्राय एकल गायनमा रमाउँदै आएकी जशोदले यसपटक युगल स्वरमा आफूलाई प्रस्तुत गरेकी हुन् । जशोदाका यसअघिका गीतहरु दर्शक तथा श्रोताले रुचाएका छन् ।

यस्तै, उनी आफ्नो पछिल्लो गीतबाट पनि आशावादी छिन् । उनी भन्छिन्, ‘यो मेरो पछिल्लो युगल गीत हो, जसबाट दर्शक तथा श्रोताको माया पाउने अपेक्षा गरेकी छु ।’