काठमाडौं, १६ असार । जनता समाजवादी पार्टी (जसपा) ले पार्टीका तर्फबाट सरकारमा सहभागी सबै मन्त्रीहरुलाई फिर्ता बोलाएको छ ।
जसपाको केन्द्रीय कार्यकारिणी बैठकबाट गत सोमबार मन्त्रीहरु फिर्ता बोलाउने र नयाँ मन्त्री सिफारिस गर्ने अधिकार लिएका अध्यक्ष उपेन्द्र यादवले मन्त्रीहरुलाई फिर्ता बोलाएका हुन् ।
पार्टीको कार्यलय सचिव प्रकाश अधिकारी सम्पूर्ण मन्त्रीलाई फिर्ता बोलाइएको पुष्टि गरे । तर पार्टीले फिर्ता बोलाए पनि सरकारमा सहभागी मन्त्रीहरुले पदबाट राजीनामा भने दिएका छैनन् ।
यादवले नयाँ मन्त्रीहरुको नाम पनि बिहीबार नै प्रधानमन्त्री शेरबहादुर देउवालाई बुझाईसकेको बुझिएको छ ।
जसपाबाट सरकारमा संघीय मामिला तथा सामान्य प्रशासन मन्त्री राजेन्द्र श्रेष्ठ, भौतिक पूर्वाधारमन्त्री रेणुकुमारी यादव, वन मन्त्री रामसहायप्रसाद यादव र कृषि तथा पशुपंक्षि विकास मन्त्री महिन्द्र राय यादव रहेका छन् ।
जसपाबाट डा. बाबुराम भट्टराई पक्ष बाहिरिने तयारी गरिरहेकाले अध्यक्ष यादवले सम्भावित फुटबाट कम क्षति हुने गरी नयाँ मन्त्रीहरुको नाम सिफारिस गरेको बुझिएको छ ।
