काठमाडौं, १९ जेठ । नाबालिगमाथि बलात्कारको आरोपमा थुनामा रहेका कलाकार पल शाहलाई तारेखमा छाड्न उच्च अदालत पोखराले अस्वीकार गरेको छ ।

उच्च अदालतका न्यायाधीशद्वय उज्ज्वल शुक्ल र श्रीधराकुमारी पुडासैनीको बिहीबारको संयुक्त इजलासले तनहुँ अदालतकै आदेश सदर गर्दै उच्च अदालत पोखराले तारेखमा छोड्न अस्वीकार गरेको हो ।

तनहुँ उच्च अदालतले गत चैत १० गते आदेश दिँदै पललाई पुर्पक्षका लागि थुनामा पठाउने आदेश दिएको थियो । नाबालिग गायिकाले आफूमाथि पटक–पटक बलात्कार गरेको भन्दै पलविरूद्ध तनहुँ र नवलपुर जिल्ला अदालतमा जाहेरी दिएपछि पल पक्राउ परेका थिए ।

तर, पछिल्लो पटक पीडित भनिएकी गायिका र उनका परिवारले अदालतमा बकपत्र गर्दा बयान फेरेका थिए । उजुरीकर्ताले नै बयान फेरे पनि अदालतले पललाई तारेखमा रिहा गर्न अस्वीकार गरेको हो ।