काठमाडौं, ९ वैशाख (एजेन्सी) । प्रजातान्त्रिक जनवादी गणतन्त्र कोरियाका शीर्ष नेता किम जोङ उनले दक्षिण कोरियाका राष्ट्रपति मुन जे–इनसँग व्यक्तिगत पत्र आदानप्रदान गरेको आधिकारिक कोरियाली केन्द्रीय समाचार एजेन्सीले शुक्रबार जनाएको छ ।
रिपोर्टमा भनिएको छ, नेता किमले बुधबार मुनबाट व्यक्तिगत पत्र प्राप्त गरेपछि बिहीबार आफ्नो जवाफी पत्र पठाएका छन् र दुई नेताहरूले पत्रहरूमा शुभकामना आदानप्रदान गरेको बताइएको छ ।
केसीएनएका अनुसार मुनले आफ्नो पत्रमा उत्तर–दक्षिण संयुक्त घोषणालाई आफ्नो अवकाशपछि पनि पुनर्मिलनको आधार बनाउन आफू इच्छुक रहेको बताएका छन् ।
आफ्नो जवाफमा, किमले आफ्नो कार्यकालको अन्तिम दिनसम्म राष्ट्रको सो महान कार्यका लागि मुनले गरेको पीडा र प्रयासको प्रशंसा गर्दै यदि दुबै देशले चाहेको र अपेक्षा गरे अनुसार अन्तर–कोरियाली सम्बन्ध सुधार र विकास हुनेछ भन्ने आशय व्यक्त गरेका छन् ।
दुवै देशहरूले आशाका साथ अथक प्रयास गरिरहेका छन् । दुई नेताहरू बीचको व्यक्तिगत पत्रको आदानप्रदान ‘उनीहरूको गहिरो विश्वासको अभिव्यक्ति हो,’ रिपोर्टमा थपिएको छ ।
द्विपक्षीय सम्बन्ध सुधार गर्न किम र मुनले २०१८ मा तीन पटक भेटवार्ता गरेका थिए । त्यस वर्ष सेप्टेम्बर १९ मा दुई नेताहरूले प्योङयाङमा एक सम्झौतामा हस्ताक्षर गरेका थिए जसमा सैन्य सम्झौता, नागरिक आदानप्रदान र थुप्रै क्षेत्रमा सहयोगको लागि आह्वान गरिएको थियो ।
