काठमाडौं, ३० फागुन । रुसले युक्रेनमाथि जारी आफ्नो आक्रमणका लागि बेइजिङसँग सैन्य तथा आर्थिक सहयोग उपलब्ध गराउन माग गरेको भन्ने अमेरिकी अधिकारीहरूको दावी ‘मिथ्या सूचना’ भएको चीनले बताएको छ ।

नाम उल्लेख नगरी अमेरिकी अधिकारीहरूले अमेरिकी सञ्चारमाध्यमहरूलाई रुसले चीनसँग युक्रेनमा जारी आक्रमणका लागि सहयोग उपलब्ध गराउन अनुरोध गरेको बताएका थिए । त्यसप्रति अमेरिकाले मस्कोलाई समर्थन जनाए बेइजिङले ‘कठोर परिणाम’ सामना गर्नुपर्ने चेतावनी दिएको थियो ।

तर, बेइजिङमा पत्रकार सम्मेलनमा बोल्दै चिनियाँ विदेश मन्त्रालयका प्रवक्ताले उक्त लडाइँमा चीनको भूमिकाबारे वासिङ्टनले ‘गलत नियत राखेर’ भ्रम फैलाइरहेको आरोप लगाए ।

उनले चीनले शान्ति र संवादका लागि अनुरोध गर्दै रचनात्मक भूमिका खेलिरहेकोमा जोड दिएका छन् । बिबिसी नेपाली