काठमाडौं, २४ माघ । सरकारले स्थानीय तहको चुनाव आगामी वैशाख ३० गते गर्ने निर्णय गरेको छ ।
सोमबार बसेको मन्त्रिपरिषद् बैठकले २०७९ वैशाख ३० मा स्थानीय तहको चुनाव गर्ने निर्णय गरेको हो । साथै यसपटक भने एकै चरणमा निर्वाचन गर्ने पनि बताइएको छ ।

यसअघि सरकारले जेठमा चुनाव गर्ने तयारी गरे पनि निर्वाचन आयोगले आफूहरू वैशाखमै चुनाव गर्न सक्षम रहेको बताएपछि सरकारले वैशाखमै स्थानीय तहको चुनाव गर्ने निर्णय गरेको हो ।

स्थानीय तहको अघिल्लो निर्वाचन तीन चरण (२०७४ वैशाख ३१, असार १४ र असोज २)मा भएको थियो । स्थानीय तह निर्वाचन ऐनअनुसार हाल कायम रहेका स्थानीय जनप्रतिनिधिको कार्यकाल ५ जेठ २०७९ मा सकिने छ ।