मछिन्द्र क्लबले एएफसी कप छनोट खेल्ने
अखबार टुडे
प्रकाशित:
२०७८, १९ पुष

काठमाडौं, १९ पुस । सहिद स्मारक ‘ए’ डिभिजन लिग फुटबल प्रतियोगिताको साविक विजेता मछिन्द्र फुटबल क्लबले एएफसी कप छनोट खेल्ने भएको छ ।

त्रिपुरेश्वरस्थित दशरथ रङ्गशालामा आइतबार भएको खेलमा नेपाल पुलिस क्लबलाई १–० गोल अन्तरले पराजित गर्दै सहिद स्मारक ‘ए’ डिभिजन लिग फुटबलको शीर्ष स्थानमा उक्लिएसँगै मछिन्द्रले सो छनोट खेल्ने पक्का गरेको हो ।

मछिन्द्रको जितमा सुनिल बल नायक बने । उनले खेलको २१औँ मिनेटमा निर्णायक गोल गरेका थिए । जितसँगै मछिन्द्रले पहिलो पटक एएफसी कप छनोट खेल्ने भएको छ ।

अखिल नेपाल फुटबल सङ्घ (एन्फा)को सातौँ चरणको शीर्ष टोलीले एएफसी कप छनोट खेलाउने प्रस्तावलाई एसियाली फुटबल महासङ्घ (एएफसी)ले स्वीकार गरेको थियो ।

त्यसैअनुरुप मछिन्द्र छनोट भएको हो । अघिल्लो पटक क्लब लाइसेन्स नभएका कारण मछिन्द्रले एएफसी कपको छनोट खेल्न पाएको थिएन् । गत वर्ष नेपाली सेनाको आर्मी फुटबल क्लबले सो छनोट खेलेको थियो ।

जितपछि मछिन्द्रले सात खेलमा १७ अङ्क जोडेको छ । त्यस्तै समान खेल खेलेको मनाङ मस्र्याङ्दी क्लब १६ अङ्कका साथ दोस्रो स्थानमा छ । सात खेल नै खेलेको पुलिस ६ अङ्कका साथ ११औँ स्थानमा छ ।

प्रतिक्रिया