अन्तरजातीय विवाह: निर्घात कुटपिट गरि बेपत्ता पारिएका युवक भेटिए
अखबार टुडे
प्रकाशित:
२०७८, ७ पुष

सिमकोट, ७ पुष । अन्तरजातीय विवाह गरेका कारण बेपत्ता पारिएका युवक आज प्रहरीको सम्पर्कमा आएको छ ।

युवतीका माइती पक्षद्वारा निर्घात रुपमा कुटपिट गर्दै अपहरण गरी बेपत्ता पारिएका ती युवकको खोजी कार्यलाई तीव्र पारेपछि खार्पुनाथ प्रहरी चौकीले आज बिहान भेटाएको जिल्ला प्रहरी कार्यालय हुम्लाका निरीक्षक दानसिंह भण्डारीले बताए । बाटोमा हिड्दै गरेको क्रममा खार्पु प्रहरी चौकीका सुरक्षाकर्मीले भेटाएको निरीक्षक भण्डारीले बताए । बेपत्ता पारिएका युवक अहिले प्रहरीको सम्पर्कमा रहेका छन् ।

सर्केगाड गाउँपालिका–१ को जैर गाउँका १९ वर्षीय चन्द्रे कामीले मुगु जिल्ला सोरु गाउँपालिका–४ को लिप्रु गाउँकी १९ वर्षीया सुन्तली मल्लसँग गत मङ्सिर ५ गते मल्लको घरबाटै भागी विवाह गरेका थिए ।

अन्तरजातीय विवाह गरेकै कारण युवती पक्षका माइतीले युवकपक्षीय कामीलाई निर्घात कुटपिट गर्नुका साथै कामीलाई बेपत्ता पारेका थिए । करिब २० जनासम्मको समूहले गत मङ्सिर २९ गते रातिको समयमा जैरका गाउँका अन्य छिमेकीका घरमा ताला लगाइ चन्द्रेको घरको ढोका, झ्याल र छतको दाँती फाल्दै घरपरिवारलाई निर्घात रुपमा कुटपिट गरेका थिए ।

बेपता पारिएका युवक प्रहरीको सम्पर्कमा आएपछि युवक कामी र युवती मल्लपक्षसँग बुझेर आवश्यक अनुसुन्धान गरी कानुनी कारबाहीको दायरामा ल्याउने जिल्ला प्रहरी कार्यालय हुम्लाले जनाएको छ । प्रहरीले माइतीपक्षका बुबा र युवतीलाई अनुसन्धानका लागि नियन्त्रणमा लिइसकेको छ ।

प्रतिक्रिया