काठमाडौं, ५ कार्तिक । नेपाली यू–२३ टोली इन्डोनेसियासँग मैत्रीपूर्ण फुटबलमा दुई–शून्यले पराजित भएको छ ।
एएफसी एसियन कप छनोटको तयारीमा रहेको नेपाली टोलीले शुक्रवार भएको मैत्रीपूर्ण खेलमा इन्डोनेसियाको यू–२३ टोलीसँग हार बेहोरेको हो ।
पहिलो हाफ गोलरहित बराबरी खेले पनि ५५ औँ मिनेटमा र खेलको इन्जुरी समयमा गोल खान पुग्यो । यू–२३ एएफसी एसियन कप छनोटमा नेपाल समूह ‘बी’ मा छ ।
नेपालको समूहमा ताजिकिस्तान, लेबनान र इरान छन् । नेपालले समूह चरणको पहिलो खेलमा इरानसँग आउँदो सोमवार खेल्दैछ । यस्तै दोस्रो खेलमा ताजिकिस्तानसँग विहीबार खेल्ने छ भने अन्तिम खेलमा लेबनानसँग आउँदो १४ गते खेल्नेछ ।