काठमाडौं, १५ असोज । एभरेस्ट प्रिमियर लिग (ईपीएल) क्रिकेटमा ललितपुर प्याट्रियट्सले विराटनगर वारियर्सलाई ३७ रनले हराएको छ ।
शुक्रवार किर्तीपुरस्थित त्रिवि क्रिकेट मैदानमा ललितपुरले दिएको दुई सय २७ रनको विशाल लक्ष्य पछ्याएको विराटनगरले २० ओभरमा आठ विकेट गुमाएर एक सय ८९ रन मात्र बनाएपछि ललितपिुर ३७ रनले विजय भएको हो ।
विराटनगरका लागि दिलशन मुनावीराले ५९, आशिफ शेखले ३७, चन्द्रपल हेमराजले २८ र सिकन्दर राजाले २४ रन बनाए । ललितपुरका अजमतुल्लाह ओमरजाईले चार, ललित राजवंशीले दुई र योगेन्द्र सिंह कार्कीले एक विकेट लिए ।
टस हारेर पहिले ब्याटिङ गरेको ललितपुरले २० ओभरमा पाँच विकेट गुमाएर दुई सय २६ रन बनायो । ललितपुरका लागि सन्दुन वीराकोदीले ७३ र अजमतुल्लाह ओमरजाईले अविजित ५८ रन बनाए । त्यस्तै कुशल भुर्तेलले ३२ र योगेन्द्र सिंह कार्कीले २७ रनको योगदान गरे ।
जितसँगै ललितपुर तीन अङ्कसहित तालिकाको चौथो स्थानमा उक्लिएको छ भने विराटनगर वारियर्स अझै जितविहीन छ ।