काठमाडौं, ८ असोज । मेगास्टार राजेशपायल राईको पछिल्लो गीत ‘देम सारो’ सार्वजनिक भएको छ । गीत रेकर्डिङ भएदेखि नै चर्चामा आएको यो गीत राजेशपायलको पनि महत्वकांक्षी गीत हो ।
शुक्रबार सार्वजनिक गरिएको यस गीतको भिडियोमा नेपाली कला क्षेत्रमा ख्यातीप्राप्त कलाकारहरुले अभिनय गरेका छन् । ‘देम सारो’ गीतको भिडियोमा अभिनेता दयाहाङ राई, हाँस्यअभिनेता विल्सनविक्रम राई र अभिनेत्री रजनी गुरुङलाई फिचरिङ गरिएको छ ।
नेपाली कला क्षेत्रमा यी तीन हस्तीसँगै मेगास्टार राजेशपायललाई समेत भिडियोमा देख्न सकिन्छ । राजेशपायलकै संगीत रहेको यस गीतको भिडियोलाई रोमान्टिक बनाउन अन्तिमचिर अभिनेता बुद्धि तामाङ ‘होइट’लाई इन्ट्रि गरिएको छ ।
यस भिडियोको अर्को विशेषता भने गीतसंगीतदेखि अभिनयसम्मका स्टारहरुलाई जमघट गराउनु हो । साथै, भिडियोमा चर्चित कवि तथा साहित्यकार राजन मुकारुङको शब्द रचना रहेको यस गीतको भिडियोमा त्रिकोणात्मक प्रेमभाव प्रस्तुत गरिएको छ । भिडियोको निर्देशन किरण चाम्लिङ राईले गरेका हुन् ।
