काठमाडौं, ८ असोज । संवैधानिक इजलास गठनबारे विवादमा सर्वोच्च अदालतले एमिकस क्युरीको राय लिएरमात्र थप आदेश गर्ने भएको छ ।
रिटमा संवैधानिक इजलासमा प्रधानन्यायाधीश अनिवार्य रहनुपर्ने माग रहेको छ । शुक्रबार उक्त रिट निवेदनमाथि न्यायाधीशद्वय प्रकाशकुमार ढुङ्गाना र डा. मनोजकुमार शर्माको संयुक्त इजलासले एमिकस क्यूरी पठाउन आदेश दिएका हन् ।
इजलासको आदेशअनुसार एमिकस क्यूरीका रूपमा सर्वोच्च अदालत बार र नेपाल बारले दुई÷दुई सदस्य पठाउने छन् । यसअघि उक्त रिट निवेदनमाथि न्यायाधीश हरिप्रसाद फुयाँलको एकल इजलासमा सुनुवाइ भएको थियो । इजलासले अन्तरिम आदेश जारी गर्दै विपक्षीलाई लिखित जवाफ बुझाउन समेत आदेश दिएको थियो ।
अधिवक्ता गणेश रेग्मीले संवैधानिक इजलासमा प्रधानन्यायाधीश अनिवार्य रहनुपर्ने दाबी उक्त रिट निवेदनमा गरेका छन् ।