काठमाडौं, २१ भदौं । संखुवासभाको मादी नगरपालिका–१ खोलागाउँस्थित एकै परिवारका ६ जनाको धारिलो हतियार प्रयोग गरी हत्या भएको छ ।
जिल्ला प्रहरी कार्यालय संखुवासभाका प्रमुख डिएसपी लालध्वज सुवेदीका अनुसार ५८ बर्षीय तेजबहादुर कार्की, उनकी आमा ८० बर्षीय पार्वता कार्की, श्रीमती ५६ बर्षीय मनमाया कार्की, २८ बर्षीय बुहारी रञ्जना कार्की, १० बर्षीय नाती दिपक कार्की र ५ बर्षीय नातिनी गोमा कार्कीको हत्या भएको हो । तेजबहादुरका अन्दाजी ९२ वर्षीय बुवा भने घरभित्रै सकुशल फेला परेको जनाएका छन् ।
कसैको शव बाटोमा, कसैको बारीमा र कसैको खोल्सामा भेटिएको बताइएको छ । डिएसपी सुवेदीले गएराति हत्या भएको हुनसक्ने भन्दै घटनाको अनुसन्धान भइरहेको बताए । साथै, अहिलेसम्म कोही पनि पक्राउ नपरेको उनले बताए ।