काठमाडौं, १८ भदौं । अमेरिकाको न्यूयोर्क सहरमा बाढीमा परी तीन जना नेपालीको मृत्यु भएको छ । आइडा नामक आँधी र भीषण वर्षापछि आएको बाढीले तीन जना नेपालीको ज्यान लिएको हो ।

मृत्यु हुनेमा सोलुखुम्बु जिल्ला दुधकुण्ड नगरपालिका–२ जुनवेशी स्थायी घर भइ हाल न्युयोर्क बसोबास गर्दै आएका आङगेलु लामा, उनकी पत्नी मिङमार शेर्पा र १९ महिनाको छोरा लोप्साङ लामा छन् । युनाईटेड शेर्पा एसोसिएसन न्यूयोर्कका अनुसार उनीहरुको बाढीमा परी मृत्यु भएको हो ।

केही दिनयता अमेरिकाको ६ वटा राज्यमा वर्षा, बाढी र आँधीका कारण ४३ जनाको मृत्यु भइसकेको छ भने न्यूजर्सीमा मात्र २३ जनाको मृत्यु भएको छ ।

यसैबेला अमेरिकी राष्ट्रपति जो बाइडनले जलवायु परिवर्तनको समस्यासँग जुध्न ऐतिहासिक लगानी आवश्यक रहेको बताएका छन् । जलवायु सम्बन्धी संकटको सामना गर्नु भनेको जीवन र मरणको सवाल भएको बाइडनले बताएका छन् ।

समुद्री आँधी आइडाको प्रभावका कारण न्यूयोर्क र न्यूजर्सी राज्यमा भारी वर्षा भएको छ । यो अस्वाभाविक भएको मौसमविदहरुले बताएका छन् ।
न्यूजर्सीमा २३ जना, न्यूयोर्कमा १४ जना, पेन्सलभेनियामा ३ जना र कनेटिकटमा एकजनाको मृत्यु भएको अधिकारीहरुलाई उद्धृत गर्दै बीबीसीले जनाएको छ ।

न्यूयोर्कका सडकहरु डुबानमा परेका छन् भने धेरैजसो रेल सेवा अवरुद्ध भएको छ । हवाई उडानहरु समेत रद्द गरिएको बताइएको छ । न्यूजर्सीका गभर्नर फिल मर्फीले आफ्नो राज्यमा मृत्यु भएकाहरुमध्ये धेरैजसो पानीको सतह बढेपछि आफ्नै सवारीसाधनमा फसेकाहरु रहेको बताएका छन् ।