काठमाडौं, ९ भदौं । निर्वाचन आयोगले प्रस्तावित नेकपा एकीकृत (समाजवादी) र जनता समाजवादी (लोकतान्त्रिक) पार्टी दर्ता प्रक्रियाका लागि आज सनाखत गराउँदैछ । आयोगले बुधबार बिहान ११ः३० बजेदेखि २ बजेसम्म सनाखतका लागि समय तोकिएको छ ।
प्रस्तावित नेकपा एकीकृत (समाजवादी) एमालेका वरिष्ठ नेता माधवकुमार नेपाल नेतृत्वको हो भने लोकतान्त्रिक समाजवादी पार्टी जसपाका नेता महन्थ ठाकुर नेतृत्वको हो ।
सरकारले राजनीतिक दलसम्बन्धी अध्यादेशअनुसार नयाँ दल दर्ताका लागि संघीय संसद् वा केन्द्रीय सदस्यको २० प्रतिशत हुनुपर्छ । एमालेका सांसद तथा केन्द्रीय सदस्यहरूले वरिष्ठ नेता नेपाल अध्यक्ष हुने गरी नयाँ दल दर्ता गर्न निवेदन दिएका थिए । त्यसमा ५७ केन्द्रीय सदस्यको नामावली उल्लेख गरिएको थियो ।
अध्यादेश अनुसार २० प्रतिशत बनाउन २ सय ३ सदस्यीय एमाले केन्द्रीय सदस्यमध्ये ४१ जनाको समर्थन आवश्यक छ ।त्यसै गरी, जसपा (लोकतान्त्रिक)मा पार्टीका ३७ सांसद मध्ये ठाकुरको पक्षमा १४ जना सांसदहरू हुनुपर्ने हुन्छ ।
नयाँ दल दर्ताका लागि दिएको निवेदन ऐनले तोकेबमोजिम कागजात र विवरण संलग्न छ कि छैन भनेर हेरेर दर्ताका लागि प्रक्रिया अघि बढाउनुपर्ने प्रावधानअनुरूप सनाखतको प्रबन्ध मिलाइएको हो ।
राजनीतिक दलसम्बन्धी ऐन–२०७३ मा दल दर्ताका लागि दलको प्रमुख पदाधिकारीले केन्द्रीय समितिको निर्णयसहित दलको विधान, घोषणापत्र, झण्डा, चिह्नको नमुनालगायत कागजात कागजात संलग्न गराउनुपर्ने छ ।
