काठमाडौं, २३ साउन । बालाजु औद्योगिक क्षेत्रमा आगलागी भएको छ । औद्योगिक क्षेत्रमा रहेको विष्कुट फ्याक्ट्रिमा गएराति करिब दुई बजेदेखि सुरु भएको आगलागी अझै नियन्त्रणमा आएको छैन ।

प्रहरीका अनुसार बिहान हेलिकप्टरबाट पानी हालेर आगलागी नियन्त्रणमा लिने प्रयास गरिएको थियो । सिम्रिक एयरको हेलिकप्टरबाट आगलागी भएको ठाउँमा पानी हालिएपनि घरभित्रको आगलागी भएकोले नियन्त्रण लिन सम्भव नभएको बताइएको छ ।

आगो नियन्त्रण गर्न रातिदेखि नै ९ वटा बारुणयन्त्र खटाइएको थियो । तर, नियन्त्रण नभएपछि बिहान हेलिकप्टरको प्रयोग गरिएको थियो । आगो नियन्त्रणमा नआएपछि हेलिकप्टर पनि फर्किएको प्रहरीको भनाइ छ । आगलागीको कारण अहिलेसम्म नखुलेको प्रहरीले जनाएको छ ।