काठमाडौं, १० चैत । नेपालमा पुनः कोरोना संक्रमित बढ्न थालेका छन् । मंगलबार १ सय ८८ जनामा संक्रमण पुष्टि भएको छ । केही दिनअघिसम्म एक सयभन्दा कम संक्रमित भेटिएका थिए । तर, दुई दिन यता संक्रमितको संख्यामा बृद्धि भइरहेको छ । सोमबार १५० जनामा संक्रमण पुष्टि भएको थियो ।
मंगलबार ४ हजार ३२ जनामा पीसीआर परीक्षण गर्दा १ सय ८८ जनामा संक्रमण पुष्टि भएको हो । यही अवधिमा ७७ जना निको भएका छन् ।
छिमेकी मुलुक भारतमा कोरोना संक्रमणको दोस्रो लहर सुरु भएसँगै नेपालमा संक्रमण फैलने खतरा बढेको जनस्वास्थ्यविद्हरुले बताउँदै आएका छन् ।
हालसम्म नेपालमा २ लाख ७६ हजार २४४ जनामा संक्रमण पुष्टि भइसकेको छ भने २ लाख ७२ हजार ९७ जना निको भएका छन् । हालसम्म कोभिड–१९ बाट नेपालमा ३ हजार १९ जनाको मृत्यु भएको छ ।