काठमाडौं, ६ पुस । निवर्तमान संस्कृति, पर्यटन तथा नागरिक उड्डयनमन्त्री योगेशकुमार भट्टराईले सुशासन प्रवद्र्धन, नीतिगत सुधार तथा नागरिक उड्डयन क्षेत्रको पूर्वाधार विकासमा उल्लेख्य सुधार भएको बताएका छन् । विकसित राजनीतिक घटनाक्रमपछि आइतबार पदबाट राजीनामा दिएका भट्टराईले सोमबार मन्त्रालयमा आयोजित बिदाइ कार्यक्रममा आफ्नो १७ महिने कार्यकालको प्रगति विवरण सुनाउँदै यस्तो बताएका हुन् ।
उनले विश्वव्यापी महामारीका रुपमा फैलिएको कोभिड–१९ संक्रमणको विषमावस्थामा पनि मन्त्रालयले नीतिगत र प्रशासनिक सुधारका काम गरेको जिकिर गरे । नागरिक उड्डयनतर्फ पूर्वाधार क्षेत्रमा उल्लेख्य प्रगति हासिल भएको बताउँदै उनले भने, ‘चाहेर पनि मन फुकाएर काम गर्न र प्रभावकारी योजना अघि बढाउन सकिएन । संकुचित र नियन्त्रित ढ्रगले काम गर्नुपर्ने बाध्यता थियो, त्यसैले सोचेअनुरुप उपलब्धि भएन ।’
नेपाल कम्युनिष्ट पार्टी (नेकपा)का नेता भट्टराईले २०७६ साउन १५ गते पर्यटनमन्त्रीको जिम्मेवारी सम्हालेका थिए । त्यतिखेर सरकारले सन् २०२० लाई ‘नेपाल भ्रमण वर्ष–२०२०’ मनाउने घोषणा गरेका उनीमाथि बढी जिम्मेवारी थियो । मुलुकको अर्थतन्त्रको मुख्य आधार पर्यटन क्षेत्रमा पूर्वाधार विकास र गन्तव्य प्रवद्र्धन गरी अर्थतन्त्रलाई बलियो बनाउने दायित्वलाई पनि आत्मसात् गरेर कार्ययोजना अघि बढाइएको पूर्वमन्त्री भट्टराईले बताए ।
पर्यटन मन्त्रालयले अघिल्लो आर्थिक वर्षमा झण्डै ६० प्रतिशत भौतिक प्रगति गरेको थियो । महामारीका कारण छ महिना पूँ“जीगत खर्च हुन नसकेको र प्रभावकारीरुपमा जनशक्ति परिचालन हुन नसकेपछि मन्त्रालयले लिएको ८० प्रतिशतभन्दा बढी लक्ष्यलाई भेट्टाउन नसकिएको भट्टराईको भनाइ छ । निवर्तमान मन्त्री भट्टराईले पूर्वाधार विकास, आधुनिक उपकरण जडान र सुरक्षित उडानमा प्रगति हासिल भएको दावी गरे । युरोपेली संघले नेपालको हवाई क्षेत्रमाथि लगाएको प्रतिबन्ध फुकुवाका लागि सकारात्मक पहलकदमी लिएको र अब छिट्टै नेपाल संघको सुरक्षा चासो सूचीबाट हट्ने विश्वास व्यक्त गरे ।
पर्यटन मन्त्रालयका सचिव यादवप्रसाद कोइरालाले सुशासन प्रवद्र्धन, राष्ट्रिय गौरवका आयोजनाको निरन्तर अनुगमन तथा कुनै विषयमा छिट्टै निर्णय लिन सक्ने नेतृत्वदायी क्षमता भएका पर्यटनमन्त्रीको बिदाइ गर्नुपर्दा दुःख लागेको बताए