काठमाडौं, ४ असोज । झण्डै पाँच वर्षपछि रानीपोखरी आफ्नो लयमा आएको छ । काठमाडौंको आकर्षणका रुपमा रहेको रानीपोखरी २०७२ सालको भूकम्पले क्षति पुर्याएपछि चौरमा परिणत भएको थियो । रानीपोखरीको पुनर्निमाण खानेपानी मन्त्रालयको सहयोगमा आयोजना कार्यान्वयन निर्देशनालयले पोखरीमा पानी भरेको हो ।
धार्मिक तथा सांस्कृतिक धरोहरका रुपमा रहेको रानीपोखरी पानी भरेपछि पुनः सुन्दर बनेको छ । खानेपानी तथा सरसफाई मन्त्रालयअन्तर्गत आयोजना कार्यान्वयन निर्देशनालयका निर्देशक भोजविक्रम थापाका अनुसार रानीपोखरीमा ३ करोड लिटर पानी भरिएको हो । रानीपोखरीको लम्बाई १८० मिटर रहेको छ भने चौडाई १४० मिटर रहेको छ ।